Wāhanga 2: Ngā whakaritenga a Te Puni Kōkiri ki Te Rautaki Reo Māori

2.1
Kei roto i tēnei Wāhanga, ko mātou ka:

• whakatakoto i tētahi whakarāpopotonga o ngā herenga Rautaki ki te whakarite, ki te aromatawai i ngā mahinga a ngā pokapū ārahi ki te hanga, me te whakamahi i ā rātou mahere Rautaki;
• whakaahua i te mahere kua hangaia e TPK;
• whakatakoto i ā mātou kitenga mō te whānui o ngā herenga Rautaki kua oti i a TPK ( te pokapū ārahi e pupuri ana i te mana whakahaere mō ngā herenga Rautaki ); me te
• whiriwhiri i te kounga o ngā pūrongo a TPK ki te Minita mō ngā Take Māori.

Ngā whakahaere a Te Rautaki Reo Māori

2.2
E whakahau ana te Rautaki kia whakaritea, kia tautokona e TPK ngā mahinga Rautaki ki runga i ngā pokapū ārahi, tāpiri atu ki te aromatawai i te whanaketanga a ngā pokapū ārahi me te kawenga o ā rātou mahere, whakamahere rānei.

2.3
Hei wāhanga o te whakamanatanga i te Rautaki, i whakahau te Komiti Whakahaere a te Pāremata i a TPK ki te whakamahi i tāna tūranga whakarite, tautoko, kia:

• whakatū i tētahi komiti whāiti o ngā āpiha o ia o ngā pokapū ārahi; me te
• hanga pukapuka whakamāramatanga i waenga i TPK, Te Taura Whiri i te Reo Māori, me ēra ake pokapū, e kī ana, mā TPK e aromatawai, e tuku tohutohu mō te whanaketanga a ngā pokapū ārahi, me te kawenga o ngā mahere whakamahinga, ā, mā Te Taura Whiri e tuku tohutohu tikanga reo.

Te mahere whakamahinga a Te Puni Kōkiri

2.4
I hangaia e TPK tētahi mahere whakamahinga Rautaki hukihuki i mua o te 30 o Pipiri 2004, e whakaatu ana ka pēwhea ia e whakatutuki i āna mahi whakarite, aromatawai, arotake.

2.5
Kua tuhia ki roto i te mahere whakamahinga Rautaki hukihuki ngā kaupapa katoa e whakahaua ana e te Rautaki, tāpiri atu ki tētahi pūnga mārama o ngā mahi i whakamaheretia e TPK hei mahi, ngā huanga me ngā mahinga mārama, me tētahi wātaka hei whakatutuki i ngā mahinga i whakamaheretia. Heoi, kāhore i whakaotingia te mahere, kāhore hoki he wāhanga iti i roto i ētahi o ngā kaupapa. Hei tauira, e kī ana i roto i te mahere hukihuki, ka arotake a TPK i tāna mahi atu ki tōna wātaka mahinga, ka tuku mā ērā o ngā pokapū e whakapūmau i te puata me te kounga o te kawenga i ōna huanga. Engari kāhore i whakamārama ka pēwhea tēnei.

2.6
E rua ngā huanga rima-tau i roto i te mahere whakamahinga hukihuki:

• i mua o te tau 2008, ka hangaia ki roto i ngā kaupapa here me ngā kōkiri reo Māori Kāwanatanga katoa, tētahi pūnga mārama e whakapūtake ana ki te Rautaki; ā,
• i mua o te tau 2008, ka whakaritea kia tōtika ngā kaupapa here reo Māori katoa hei whakapūmau huarahi kāwanatanga-whānui ki te whakahoutanga o te reo Māori.

Ā mātou kitenga

2.7
I whakamātautia e mātou ngā mahinga a TPK ki te whakarite i te Rautaki me te arotake i ngā mahi hanga, me ngā whakamahinga a ngā pokapū ārahi i ā rātou mahere Rautaki. I aromatawaitia e mātou te mahinga a TPK atu ki ngā huanga, ngā mahinga, me ngā wātaka e takoto ana i roto i te mahere whakamahinga hukihuki a TPK.

2.8
I runga i te whānuitanga, i kitea e mātou he āhua rerekē ngā mahinga a TPK i āna mahi tūranga whakarite, tautoko. Ko ngā whakaritenga me ngā tautokohanga i hoatutia ki ngā pokapū ārahi kāhore i te hāngai tōtika atu ki te whakahaere tika i ngā wero i mua o ia pokapū, me te rōpū pokapū ārahi whānui. Mai i waenganui- 2004 atu ki te tīmatanga o 2005, paku noa iho ngā mahinga a TPK ki te Rautaki, i te mea i te whakawhitiwhiti ngā kaimahi. Iti noa iho ngā whakapātanga i waenga i TPK me ngā pokapū ārahi i taua wā.

2.9
Mai i te tīmatanga o 2005, kua pai ake ngā mahinga a TPK. Kei te whakatutuki a TPK i tana tūranga whakarite, tautoko ināianei, ā, kua ahu whakamua ngā pokapū ārahi kia tutuki i a rātou ngā huanga rima-tau a TPK.

Whakaritenga me ngā tautoko atu ki te marama o Poutū-te-rangi 2005

2.10
I hangaia e TPK ngā tikanga ki te whakarite i tētahi huarahi kāwanatanga-whānui me te tautoko i ngā pokapū ārahi ki te tuhi mahere whakamahinga. I te tau 2003, i whakatūria e TPK te Komiti Āpiha Rautaki Reo Māori (KARRM), me te whai ki te hui ia rua marama, me tētahi Wānanga Tumuaki Whakahaere, me te whai kia hui ia ono marama.

2.11
I tū tonu ētahi huinga a KARRM i waenga i Mahuru 2003 me Haratua 2004, engari kāhore i hui anō tae noa ki Haratua 2005. Nā tēnei āputa kotahi tau i waenga i ngā huinga KARMM, me te rerekē o ngā haerenga atu o ētahi pokapū ārahi atu ki 2005, ka kitea te kore piripono o aua pokapū ārahi, tāpiri atu ki TPK, te kaiwhakahaere. E whakaae ana a TPK ehara te KARRM i te rōpū mahi pakari i te wā o ngā huihuinga tīmatanga, me te whakaae i runga i a TPK te mana whakahaere ki te tuku kaiārahitanga pai ake ki roto i tēnei wāhi. I whakakorea ngā huinga Rōpū Tumuaki Kaiwhakahere i muri i ngā huinga e rua.

2.12
I te mea kāhore te KARRM i te hui rite tonu, kāhore hoki he tautokohanga a te Rōpū Tumuaki Kaiwhakahaere, kāhore i a TPK tētahi āhua whakahirahira hei whakatairanga whakaritenga, whakakotahi kāwanatanga-whānui.

2.13
I tua atu i te whakatūtanga i te KARRM me te Rōpū Tumuaki Whakahaere, i mahia anō e TPK ētahi ake mahinga whakarite, tautoko. Tāpiri atu ki ēnei ko ngā huihuinga ngātahi atu ki ngā pokapū kia tuhia he pukapuka ārahi whakarārangi tikanga whakamahere Rautaki, whakawhiwhi whakaaro ā-tuhi ki runga i ngā mahere Rautaki hukihuki, me te hanga pānui kaute o ngā moni kāwanatanga i whakapaua ki runga i ngā ratonga reo Māori.

2.14
Kāhore i whakaotingia ngā Pukapuka Whakamāramatanga i waenga i TPK, Te Taura Whiri, me ētahi ake pokapū ārahi.

2.15
I te tīmatanga i whakaaro whakaheke a TPK mō te nuinga o ngā mahi mā ngā pokapū ārahi hei whakatutuki i ngā mahere whamahinga Rautaki, me te whakaaro whakapiki mō āna ake raukaha ki te āwhina i ngā pokapū ārahi ki tēnei mahi. I whakaaro whakapiki anō a TPK mō te māramatanga me te piriponotanga o ngā pokapū ārahi mō te Rautaki. Tētahi mea nui, kāhore a TPK i āta whakaaro i te wā me ngā tautokohanga e tika ana mō ngā pokapū ārahi ki te tohu, ki te hono atu, me te whakamanawa i ngā kaiwhaiwāhi i roto i ā rātou wāhanga, kia whakatū honohononga rāngai-whānui atu ki te Rautaki. Me te whakaae a TPK e tika ana kia pai ake āna whakahaere i ngā tautoko, me ngā mahi whakautu.

2.16
I te marama o Paenga-whāwhā 2004, i roto i ngā tohutohu ki te Minita mō ngā Take Māori, i kī a TPK he mahi uaua ki ētahi o ngā pokapū ārahi te whakatutuki i ā rātou mahi whai mana i raro i te Rautaki, engari ka kī anō “ kei te haere pai ngā pokapū katoa ki te whakatutuki i ā rātou mahere (whakamahinga) i mua o te rā kati, te 30 o Pipiri 2004.” Heoi, i whakamōhio atu tētahi pokapū ki TPK i te marama o Hui-tanguru 2004, e kore e oti, e tutuki tāna mahere i mua o te rā kati. Ahakoa kua oti te hanga mahere whakamahinga ukiuki e ngā pokapū, kāhore i oti, i tutuki i tētahi o rātou tētahi mahere whakamahinga Rautaki i mua o te 30 o Pipiri 2004. Me tō mātou mōhio, i te mea kāhore he āhuatanga kei TPK ki te whakahau i ngā pokapū ārahi kia mau tonu ki rā kati, ki te whakahau kaha kia mahi tonu rātou ki te whakatutuki ngā rā kati, kāhore he āhuatanga whakawhiu i ngā pokapū ārahi mō te kore whakatutuki i ā rātou mahere i mua o te rā kati, te 30 o Pipiri 2004.

2.17
I waenga i ngā tau waenganui-2004 me te tīmatanga o 2005, kāhore i whakarite, i aromatawai kaha a TPK i te whakamahinga i te Rautaki. Me te whakaae a TPK he iti noa iho ngā arotahi ki runga i te Rautaki i waenga i tēnei wā. Nā tēnei whakareretanga i ngā mahinga a TPK i ngaro te ia ahu whakamua i waenga i ētahi ake o ngā pokapū.

Whakaritenga me ngā tautoko mai i Poutū-te-rangi 2005

2.18
I te wā moata o te tau 2005, i tīmata a TPK ki te hono anō ki ētahi ake pokapū ārahi. I hui tahi a TPK ki ngā pokapū ārahi ki te whakamātau i ngā mahi kua oti, ā, kei te whakahaere hui ngātahi tonu. I te rite tonu te hui a te KARRM, me te nekenga tata atu o TPK kia arotahi kaha ake ēnei hui, me ngā huarahi hui e rite ana ki te āhua rōpū mahi. I hui anō te Wānanga Tumuaki Whakahaere i te wā tōmuri o 2006. I hainatia te (Ture Whakahaere) mō te KARRM me te Wānanga Tumuaki Whakahaere i te tau 2007. Ka whakamōhio mai ngā pokapū ārahi kua pai ake te nuinga me te hanga pai o ā rātou whakapātanga atu ki TPK mō te Rautaki, mai i te tau 2005.

2.19
I runga i te wā, kua āhua ngohengohe haere ngā whakaaro a TPK mō te mea, he aha te whakautu ka whakaaetia mō ngā whakahaere whakamahere Rautaki. Mai i te waenganui-2005, te wā i mārama mai kei te nui ngā raruraru kei ngā pokapū ārahi ki te hanga mahere whakamahinga tū ngātahi, i te arotahi a TPK ki ngā pokapū kia whakatutuki i ngā whakahaere mā runga i ētahi ake tikanga whakamahere – hei tauira, te whakauru i ngā huanga Rautaki ki roto i ā rātou Pānui Whāinga kāhore i roto i ā rātou mahere tū ngātahi. Ki te titiro a TPK ināianei ko te whakamahere Rautaki e haere tonu ana, otirā hei mea nui tēnei mō ngā pokapū ehara kō ngā mahinga reo Māori i te take tuatahi.

2.20
He mea whakahirahira rawa atu te tūranga whakarite, tautoko a TPK mō te angitu o te Rautaki. Me whakahaere tika rawa atu e TPK āna mahi, me te pupuri māramatanga pai o ngā wero kei mua o ngā pokapū ārahi, kia angitu ai te Rautaki. I tua atu, e tutuki katoa ai ngā huanga e rua a TPK mō 2008, me mātua mahi tika anō ngā pokapū ārahi katoa kia oti i ngā wā tika, me TPK anō hoki, mō ngā marama ruarua nei kei mua, taea noatia ngā rā kati.

Te kounga o ngā whakapūrongo ki te Minita mō ngā Take Māori

2.21
He aromatawai hē i roto i ngā tohutohu a TPK ki te Minita mō ngā Take Māori, i te marama o Paenga-whāwhā 2004, i reira ka kī kei te haere pai ngā pokapū katoa ki te whakatutuki i ā rātou mahere (whakamahinga) i mua o te rā kati, te 30 o Pipiri 2004, mā reira ka kitea te kore e mārama o TPK mō te nui o ngā mahi hei whakatutuki i ngā mahere. Kāhore mātou i kite i ngā whakamāramatanga i muri iho ki te Minita, he aha te take kāhore i oti, i tutuki i ngā pokapū ārahi ā rātou mahere i mua o te rā kati.

2.22
I tirohia anō e mātou ngā pūrongo whakamōhio ki te Minita o ngā tau-mutunga 2005 me 2006. E kī ana aua pūrongo i te mahi ahu whakamua ngā pokapū ārahi, engari kāhore i whakaputa pārongo mō ngā mahi ahu whakamua o ia pokapū. Kāhore rawa i tino nui ngā pārongo i roto i te pūrongo o 2006 mō te āhua o te ahunga whakamua mai i te tau o mua, ahakoa, kāhore i tūtohu i ngā kōkiri hou me ngā wāhi mō te whanaketanga ake. Me whai ngā pūrongo mutunga-tau, pūrongo ake rānei, kia whakaputa pūrongo mārama ki te Minita mō ngā mahinga o ia pokapū, me ngā mahinga ki runga i te Rautaki whānui, kia āhei a TPK ki te whakatutuki i āna mahinga, te aromatawai i ngā mahi ahu whakamua o ngā pokapū ārahi, me te whakamahinga o te Rautaki whānui.

kei runga